“Talibanın Pakistanla ənənəvi müharibə aparması ehtimalı azdır”

Talibanın Pakistanla ənənəvi müharibə aparması ehtimalı azdır.
Yeniavaz.com xəbər verir ki, bunu BBC-yə analitiklər deyiblər.
Bildirilib ki, Pakistanla Əfqanıstan Talibanı arasında hərbi potensial baxımından ciddi fərqlər mövcuddur.
“Nüvə silahına malik Pakistanın silahlı qüvvələri hərbi gücünə görə daim dünyadakı ilk 15-likdə yer alıb.
Digər tərəfdən, Əfqanıstan Talibanı eyni hərbi resurslara malik deyil və iqtisadi çətinliklərlə qarşı-qarşıyadır”, - deyə analitiklər bildirirlər.
Qeyd olunub ki, Taliban ordusuna məxsus silahlar əsasən üç mənbədən gəlir: keçmiş Əfqanıstan ordusundan qalanlar, geri çəkilən xarici qüvvələrdən qalanlar və qara bazar da daxil olmaqla müxtəlif mənbələrdən əldə etdikləri yeni silahlar.
Ekspertlər bildirirlər ki, keçmiş sərhəd toqquşmalarının videoları Taliban qüvvələrinin əsasən Pakistan qüvvələrinə qarşı yüngül silahlardan istifadə etdiyini göstərir.
Lakin analitiklər bildirirlər ki, Taliban partizan müharibəsində geniş təcrübəyə malikdir.
Əfqanıstanda yaşayan və adı açıqlanmayan təhlükəsizlik üzrə mütəxəssis bildirib ki, Talibanın Pakistan qüvvələri ilə qarşılaşmalarının çoxunda qəfil hücumlar və yol kənarındakı bombalar kimi partizan taktikaları mövcuddur.