Pakistan ordusu Kabilə və Əfqanıstanın bir sıra şəhərlərinə hava zərbələri endirib.
Yeniavaz.com xəbər verir ki, ölkənin müdafiə nazirliyi Talibana qarşı açıq müharibənin başladığını elan edib.
Pakistan hakimiyyətinin məlumatına görə, zərbələr zamanı azı 133 əfqan yaraqlı öldürülüb, silah-sursat anbarı məhv edilib.
Pakistan Baş nazirinin sözçüsü Müşərrəf Zaidi bildirib ki, Pakistanın hücumları nəticəsində indiyədək Əfqanıstanda Talibanın 27 hərbi postu məhv edilib və daha 9-u ələ keçirilib.
O, həmçinin 80-dən çox tank, artilleriya və silahlı personal daşıyıcısını məhv etdiklərini söyləyib.
“Pakistanın təcavüzə qarşı dərhal və təsirli cavabı davam edir”, - Müşərrəf “X”də yazıb.
Taliban müdafiə nazirliyi isə cümə axşamı gecəsi 19 Pakistan hərbi postunu və iki bazanı ələ keçirdiyini açıqlayıb. Nazirlik bildirib ki, ümumilikdə 55 Pakistan əsgəri öldürülüb.
BBC yazır ki, bu rəqəmləri yoxlamaq çətindir. Belə ki, hər iki tərəf bir-birinə ağır itkilər verdiyini iddia edir.
“Pakistan və Əfqanıstan qüvvələri arasında əvvəlki qarşıdurmalarda olduğu kimi, hər iki tərəf bir-birini ilk hücumda günahlandırıb.
Pakistan hakimiyyəti cümə günü bildirib ki, onlar səbəbsiz Əfqan hücumlarına cavab olaraq Kabil və Qəndəhar da daxil olmaqla şəhərlərə əks-hücumlar həyata keçiriblər.
Əfqanıstan Talibanı isə bildirib ki, bu həftənin əvvəlində ən azı 18 nəfərin ölümünə səbəb olan hücumlara cavab olaraq genişmiqyaslı əməliyyata başlayıb”, - nəşr yazır.
Tətbiqimizi yükləyə bilərsiniz
