“Telegram” apreldə Rusiyada tamamilə bloklanacaq

“Telegram” Rusiyada aprelin 1-də tamamilə bloklanacaq.
Yeniavaz.com xəbər verir ki, bu barədə RBC və “The Bell” mənbələrə istinadən məlumat yayıblar.
Eyni tarix əvvəllər təhlükəsizlik qüvvələri ilə sıx əlaqəli olan “Baza” teleqram kanalı tərəfindən də qeyd olunub.
Kremlə yaxın RBC mənbələri bloklama qərarını qəti adlandırıblar. “Böyük dördlük” mobil operatorlarından birindəki mənbə bildirib ki, onlara 1 apreldən etibarən platformanı bloklamaq üçün ilkin qərar verilib.
“Bir ay yarım ərzində hər şey dəyişə bilər, hakimiyyət orqanlarının bu məsələ ilə bağlı fərqli fikirləri var. Amma hələlik məlumat belədir: tam bloklama 1 apreldə başlayacaq”, - o əlavə edib.
Başqa bir mənbə “The Bell”ə ​​bildirib ki, mobil operatorlar artıq bloklamaya qarşı çıxmamalarını tələb edən məktub alıblar. Jurnalistlər iddia edirlər ki, mobil operatorlar “YouTube”un yavaşlaması başlamazdan əvvəl oxşar bir tələb alıblar.