ABŞ ordusu 21 fevral şənbə günü İrana zərbə endirməyə hazırdır, lakin ABŞ prezidenti Donald Tramp hələlik yekun qərar verməyib.
Yeniavaz.com xəbər verir ki, bu barədə “CBS News” telekanalı mənbələrə istinadla məlumat yayıb.
Telekanalın mənbələrinə görə, Ağ Evdə dinamik və davamlı müzakirələr davam edir. Administrasiya eskalasiyanın potensial risklərini, eləcə də həm güc tətbiqinin, həm də güc tətbiqindən imtinanın siyasi və hərbi nəticələrini qiymətləndirir.
“CBS News” mənbələri əlavə edib ki, Pentaqon yaxın üç gün ərzində Yaxın Şərqdəki qoşunlarının bir hissəsini, əsasən Avropaya və ya ABŞ-yə köçürəcək.
Onlar bildiriblər ki, bu, əməliyyata hazırlıqların aparıldığını göstərə bilər, lakin əməliyyata başlamaq qərarının artıq verilməsi demək deyil.
Digər tərəfdən, “The Wall Street Journal” qəzetinin məlumatına görə, İran uranın zənginləşdirməsini üç ilə qədər dayandırmağa hazırdır. Lakin Tramp administrasiyası proqramın tamamilə dayandırılmasında təkid edir.
Qeyd edək ki, yanvarın 26-da Vaşinqton İrana doğru nəhəng bir armadanın irəlilədiyini elan edib. Amerika tərəfi Tehranın danışıqlar masasına oturub nüvə silahlarından tamamilə imtina da daxil olmaqla ədalətli və bərabər bir razılaşma əldə edəcəyinə ümid etdiyini bildirib. ABŞ 2025-ci ilin yayında İrana qarşı zərbələrə istinad edərək növbəti hücumun daha da pis olacağı barədə xəbərdarlıq edib və bunun baş verməsinə yol verməməyə çağırıb.
Xatırladaq ki, fevralın 17-də Cenevrədə Omanın vasitəçiliyi ilə ABŞ və İran arasında nüvə danışıqlarının ikinci mərhələsi baş tutub. İranın xarici işlər naziri Abbas Əraqçinin sözlərinə görə, tərəflər gələcək nüvə sazişinin layihəsinə daxil edilə biləcək bir neçə məsələdə qarşılıqlı anlaşma əldə ediblər. ABŞ vitse-prezidenti Ceyms Devid Vens məsləhətləşmələrin bəzi aspektlər üzrə yaxşı keçdiyini, lakin Tehranın hələ Ağ Ev tərəfindən irəli sürülən bir neçə prinsipial mövqeyi qəbul etməyə hazır olmadığını bildirib.
Tərəflər növbəti danışıqlar mərhələsinin vaxtını və yerini açıqlamayıblar.
Tətbiqimizi yükləyə bilərsiniz
