Cənubi Okeanın dərinliklərində gözlənilməz bir kəşf köpəkbalıqlarının Antarktika sularında yaşamadığına dair uzun müddətdir davam edən inancı şübhə altına alıb.
Yeniavaz.com xəbər verir ki, bu barədə “The Independent” məlumat yayıb.
Belə ki, Cənubi Şetland adaları yaxınlığında 3-4 metr uzunluğunda böyük, yatmış köpəkbalığı videoya düşüb.
Görüntülər Qərbi Avstraliya Universitetinin bir hissəsi olan “Minderoo-UWA” Dərin Dəniz Tədqiqat Mərkəzinin kamerası ilə çəkilib. Cihaz təxminən 490 metr dərinlikdə, suyun temperaturunun cəmi 1,27°C olduğu yerdə yerləşib.
“Köpəkbalıqları görəcəyimizi gözləmirdik, çünki ümumi qayda budur ki, Antarktidada köpəkbalığı yoxdur. Və bu, kiçik bir balıq deyil - bu, əsl nəhəngdir”, - mərkəzin direktoru Alan Ceymison bildirib.
Onun sözlərinə görə, elmi ədəbiyyatda Cənubi Okeanda - 60-cı paralelin cənubundakı sularda köpəkbalığı müşahidələri ilə bağlı təsdiqlənmiş məlumatlar yoxdur. Çarlz Darvin Universitetinin müstəqil eksperti və təbiəti mühafizə edən bioloq Piter Keyn də qeyd edib ki, bu cür cənub müşahidələri əvvəllər heç vaxt qeydə alınmayıb.
Alimlər iqlim dəyişikliyi və okean istiləşməsinin yırtıcıların yayılmasına təsir göstərə biləcəyi ehtimalını istisna etmirlər, lakin Antarktida bölgəsində yaşayış yerlərinin dəyişməsi ilə bağlı məlumatlar hələ də kifayət deyil.
Tətbiqimizi yükləyə bilərsiniz
