“Rubio son dəqiqə Ukrayna ilə bağlı görüşdə iştirakdan imtina etdi” − KİV

ABŞ Dövlət Katibi Marko Rubio Rusiya-Ukrayna müharibəsinə həsr olunmuş Avropa liderləri ilə görüşdə iştirak etməyib.
Yeniavaz.com xəbər verir ki, bu barədə “The Financial Times” mənbələrə istinadən məlumat yayıb.
Nəşrin məlumatına görə, Rubio fevralın 13-ü Münhendə Almaniya, Fransa, Polşa və Avropa Komissiyası liderləri ilə danışıqlara qoşulmalı idi. Lakin son anda Dövlət Katibi “cədvəldəki ziddiyyətlərə görə” geri çəkilib.
Adı çəkilməyən ABŞ rəsmisi Dövlət Katibinin qərarını “eyni vaxtda planlaşdırdığı görüşlərin sayı” ilə izah edib. Rəsmi şəxsin sözlərinə görə, Rubio Münhen Konfransından əlavə, çoxsaylı digər görüşlərdə də Rusiya və Ukrayna məsələlərini müzakirə edir.
Amerikalı jurnalistlərin sözlərinə görə, Dövlət Katibi fevralın 14-ü Ukrayna lideri Volodimir Zelenski ilə görüşməyi planlaşdırır.
Bir Avropa rəsmisi Rubionun görüşdə iştirak etməkdən imtina etməsini “dəlilik” adlandırıb. İkinci bir Avropa mənbəsi FT-yə bildirib ki, ABŞ olmadan görüş mahiyyətsiz olub. Nəşr qeyd edib ki, Tramp administrasiyası getdikcə özünü Avropa müttəfiqlərindən uzaqlaşdırır və Ukraynanı Rusiya ilə sülh müqaviləsinə doğru itələməyə çalışır.
Avropa rəsmiləri hesab edirlər ki, Marko Rubionun Avropa liderləri ilə görüşdən imtina etmək qərarı ABŞ-nin münaqişənin həlli səylərinə Avropanı cəlb etməkdə getdikcə daha az maraqlı olduğunu göstərir.