Pensiyalar bu qədər artacaq – Rəqəmlər açıqlandı

Xəbər verdiyimiz kimi, Prezident İlham Əliyev “Əmək pensiyalarının indeksləşdirilməsi haqqında” Sərəncam imzalayıb.
Yeniavaz.com xəbər verir ki, Əmək və Əhalinin Sosial Müdafiəsi Nazirliyi Sərəncamla bağlı məlumat yayıb.
Bildirilib ki, Prezident İlham Əliyevin yeni Sərəncamı ilə bütün pensiyalar 2025-ci il üzrə orta aylıq əməkhaqqının illik artım göstəricisinə uyğun olaraq bu il yanvarın 1-dən 9,3 faiz indeksləşdirilməklə artırılır.
“Pensiyaların indeksləşdirilərək artırılması bütün pensiyaçılara, yəni, 1,1 milyon pensiyaçıya şamil olunur və bu artımlar üçün illik əlavə 640 milyon manat vəsait ayrılıb”, - məlumatda deyilir.
Qeyd edək ki, Azərbaycanda əmək pensiyasının minimum məbləği 320 manat təşkil edir. Hazırda minimum səviyyədə pensiya alanlar yanvar ayının 1-dən 349 manat 76 qəpik pensiya alacaqlar. Yanvar ayının artımı (29,76 manat) fevral ayının pensiyası (349,76 manat) ilə birlikdə veriləcək.
Müvafiq hesablama ilə 350 manat pensiya alanların pensiyasında 32 manat 55 qəpik, 400 manat pensiya alanların pensiyasında 37 manat 20 qəpik, 450 manat pensiya alanların pensiyasında 41 manat 85 qəpik artım olacaq.

Elnur Əli