Rusiya və ABŞ Prezidentləri Vladimir Putin və Donald Tramp arasında yaxın gələcəkdə görüş planlaşdırılmır.
Yeniavaz.com xəbər verir ki, bu barədə TASS-a Rusiya liderinin mətbuat katibi Dmitri Peskov məlumat verib.
Kreml sözçüsü Amerika lideri ilə söhbətin planlaşdırılıb-planlaşdırılmadığı sualına cavab olaraq bildirib:
“Xeyr, görüş planlaşdırılmır”.
Xatırladaq ki, 4-5 fevral tarixlərində Əbu-Dabidə Rusiya, ABŞ və Ukrayna arasında üçtərəfli danışıqların ikinci raundu keçirilib. Danışıqlardan sonra ABŞ-nin xüsusi nümayəndəsi Stiven Uitkoff Moskva və Kiyevin 314 hərbi əsir mübadiləsi barədə razılığa gəldiyini açıqlayıb. O, Rusiya və Ukrayna nümayəndə heyətlərinin qarşıdakı həftələrdə münaqişələrin həlli ilə bağlı məsləhətləşmələri davam etdirmək niyyətində olduğunu bildirib.
Rusiya, Ukrayna və ABŞ-nin iştirakı ilə üçtərəfli təhlükəsizlik məsləhətləşmələrinin birinci raundu 23-24 yanvar tarixlərində Əbu-Dabidə də keçirilib. Rusiya danışıqlar qrupuna Rusiya Silahlı Qüvvələri Baş Qərargahının Baş Kəşfiyyat İdarəsinin rəisi İqor Kostyukov rəhbərlik edib.
Tətbiqimizi yükləyə bilərsiniz
