“Toyota Motor”un yeni prezidenti o olacaq

Yaponiyanın “Toyota Motor” korporasiyasının yeni prezidenti Kenta Kon olacaq.
Yeniavaz.com xəbər verir ki, bu barədə korporasiyasının mətbuat xidməti məlumat yayıb.
Məlumata görə, o bu vaxta qədər dünyanın ən böyük minik avtomobili istehsalçısının maliyyə şöbəsinə rəhbərlik edib.
Mətbuat xidməti Konun aprel ayında vəzifəsinin icrasına başlayacağını bildirib.
Qeyd olunub ki, korporasiyanın hazırkı prezidenti, 56 yaşlı Kodzi Sato, direktorlar şurasının sədr müavini olacaq.
Şuraya “Toyota Motor” şirkətinin qurucusunun ailəsinin nümayəndəsi Akio Toyoda sədrlik edəcək.
57 yaşlı Kenta Kon korporasiyaya 1991-ci ildə qoşulub və əsasən maliyyə və mühasibat uçotu ilə məşğul olub.
Hazırkı prezident Sato isə öz növbəsində istehsal məsələlərinin həllinə, hibrid nəqliyyat vasitələrinin və lüks “Lexus” xəttinin tətbiqinə diqqət yetirib.
İndi o, əsasən ictimai funksiyalara yönəlmiş direktorlar şurasının sədr müavini vəzifəsindən əlavə, istehsal şöbəsi üçün də tam məsuliyyət daşıyacaq.
Bununla yanaşı, Sato ölkənin əsas müəssisələrinin qərargahı olan Yaponiya Biznes Federasiyasının (Keydanren) idarə heyətinin üzvüdür və Yaponiya Avtomobil İstehsalçıları Assosiasiyasına rəhbərlik edir.
Qeyd edək ki, 2025-ci ildə “Toyota Motor Group” dünya miqyasında rekord sayda - 11,32 milyon avtomobil satıb.
Korporasiyanın satışları il ərzində 4,6% artıb. Ardıcıl olaraq altıncı ildir ki, “Toyota Motor” avtomobil satışında qlobal lider olub və ötən il 8,98 milyon avtomobil satan Almaniyanın “Volkswagen” şirkətini geridə qoyub.