Moskvanın şimal-qərbində Rusiya Müdafiə Nazirliyinin general-leytenantı Vladimir Alekseyevə qarşı sui-qəsd cəhdi həyata keçirilib.
Yeniavaz.com TASS-a istinadla xəbər verir ki, bu barədə Rusiya İstintaq Komitəsinin rəsmi nümayəndəsi Svetlana Petrenko bildirib.
Onun sözlərinə görə, zərərçəkən şəhər xəstəxanasına yerləşdirilib.
Petrenko qeyd edib ki, Rusiya İstintaq Komitəsi general-leytenanta qarşı sui-qəsd cəhdindən sonra 30-cu maddənin 3-cü hissəsi, 105-ci maddənin 1-ci hissəsi (“qəsdən adam öldürməyə cəhd”) və 222-ci maddənin 1-ci hissəsi (“odlu silahın qanunsuz dövriyyəsi”) ilə cinayət işi açıb.
Müstəntiqlərin sözlərinə görə, 6 fevral 2026-cı ildə Moskvanın Volokolamskoye şossesindəki yaşayış binasında hələlik şəxsiyyəti müəyyən edilməyən bir şəxs bir kişiyə bir neçə dəfə atəş açaraq hadisə yerindən qaçıb.
Rusiya İstintaq Komitəsinin müstəntiqləri və məhkəmə ekspertləri hadisə yerində işləyir, videomüşahidə kameralarını araşdırır və hadisə şahidlərini dindirirlər.
İstintaq Komitəsinin rəsmi nümayəndəsi əlavə edib ki, onlar cinayətdə iştirak edən şəxs və ya şəxslərin müəyyən edilməsi istiqamətində istintaq və əməliyyat-axtarış tədbirləri həyata keçirirlər.
Digər tərəfdən, Rusiya Prokurorluğu general Vladimir Alekseyevə qarşı sui-qəsd cəhdi ilə bağlı cinayət işinin istintaqını nəzarətə götürüb.
Bu barədə prokurorluğun mətbuat xidmətindən məlumat verilib.
Tətbiqimizi yükləyə bilərsiniz
