Ukrayna İslam İnqilabı Keşikçiləri Korpusunu (SEPAH) terror təşkilatı elan edib.
Yeniavaz.com xəbər verir ki, bunu Ukrayna Prezidenti Volodimir Zelenski sosial şəbəkə hesabında dərc olunmuş müraciətində deyib.
O, Ukraynanın azadlığa dəyər verən və həqiqətən də bunun uğrunda mübarizə aparmağa hazır olan insanları dəstəklədiyini bildirib:
“Bütün dünya İranda baş verənləri, qətllərin sayını və İran rejiminin bölgədə və dünyada müharibə və zorakılığın yayılmasına necə töhfə verdiyini görür. Ukrayna şəhərlərimizə və kəndlərimizə, xalqımıza hücum edən minlərlə “Shahed”in heç birini unutmayacaq”.
O, qeyd edib ki, Avropa Birliyinin İran rejiminin əsas təşkilatlarından birini - SEPAH-ı terror təşkilatı kimi tanımaq qərarı effektiv şəkildə razılaşdırılıb:
“Avropa prosedurları hazırda davam edir. Biz Ukraynada artıq bu qərarı qəbul etmişik və bu təşkilatı terror təşkilatı kimi tanımışıq və bizim üçün bu məsələ bağlanıb. Dünyadakı bütün terrorçular bərabər münasibətə və qınaqlara layiqdirlər - onlar qalib gəlməməlidir”.