ABŞ Prezidenti Donald Tramp Hindistanın Baş naziri Narendra Modi ilə danışıqlardan sonra Hindistan hakimiyyətinin Rusiya neftinin alınmasını dayandırıb ABŞ-dən daha çox neft almaq barədə razılığa gəldiyini açıqlayıb.
Yeniavaz.com xəbər verir ki, ABŞ lideri söhbət zamanı Hindistanın Baş naziri ilə ticarət və Rusiya-Ukrayna müharibəsinin bitməsini müzakirə etdiklərini bildirib.
“Modi Rusiya neftinin alınmasını dayandırıb ABŞ-dən və ehtimal ki, Venesueladan daha çox neft almaq barədə razılığa gəldi. Bu, Ukraynadakı müharibənin bitməsinə kömək edəcək”, - Tramp bildirib.
O, həmçinin ABŞ və Hindistan arasında dərhal qüvvəyə minən ticarət müqaviləsini elan edib. Bu müqaviləyə əsasən, ABŞ Hindistana qarşı tarifləri 25%-dən 18%-ə endirəcək və Hindistan ABŞ-yə qarşı tariflərini və qeyri-tarif maneələrini sıfıra endirmək üçün irəliləyəcək.
Qeyd edilib ki, razılaşmanın bir hissəsi olaraq, Yeni Dehli həmçinin enerji, kömür və kənd təsərrüfatı məhsulları da daxil olmaqla 500 milyard dollardan çox dəyərində Amerika malları almağı öhdəsinə götürüb:
“Hindistanla əla münasibətlərimiz gələcəkdə daha da güclənəcək. Baş nazir Modi və mən iş görən iki insanıq ki, bu da əksəriyyətin tam əksidir”.
Öz növbəsində, Modi sosial şəbəkə hesabında danışıqları şərh edərək Trampı təriflədi və tarif endiriminə görə ona təşəkkür etdi. O, Rusiya neft alışının dayandırılmasından bəhs etmədi.
Tətbiqimizi yükləyə bilərsiniz
