Gürcüstanda 1270, Azərbaycanda 173 dollar... – Adambaşına düşən turizm gəlirləri

Ötən il Gürcüstanın xarici turistlərdən əldə etdiyi gəlir təxminən 4,7 milyard dollar təşkil edib.
Yeniavaz.com xəbər verir ki, bu barədə Gürcüstan Milli Bankı məlumat yayıb.
Bildirilib ki, bu göstərici 2024-cü illə müqayisədə 5,98% artıb.
Milli Bankın statistikasına əsasən, 2025-ci ildə Gürcüstanda ən çox vəsait xərcləyən turistlər Rusiyadan gələn qonaqlar olub. Onların xərcləri 697,3 milyon dollar təşkil edib. Rusiyadan Gürcüstana səfər edənlərin sayı isə 1 milyon 579 min nəfəri keçib.
Xərclərin həcminə görə növbəti yerlərdə Avropa İttifaqı ölkələri (660,5 milyon dollar), Türkiyə (605,9 milyon dollar) və İsrail (586,3 milyon dollar) qərarlaşıb. Azərbaycan vətəndaşları isə 2025-ci ildə Gürcüstanda 223,3 milyon dollar xərcləyiblər.
Məlumatlara görə, 2024-cü illə müqayisədə Azərbaycan vətəndaşı olan turistlərin Gürcüstandakı xərcləri 33,2% artıb.
Gürcüstanda adambaşına düşən turizm gəlirləri 2025-ci ildə 1270 dollar olub.
Müqayisə üçün bildirək ki, ötən ilin ilk 11 ayında Azərbaycana 1 milyon 666 min əcnəbi turist gəlib və onların 58 min 759 nəfəri Gürcüstan vətəndaşları olub. Əcnəbi turistlər ötən ilin ilk 11 ayında Azərbaycanda 1 milyard 773 milyon dollar (3 milyard manat) xərcləyiblər və bu məbləğin 45,7 milyon dolları (77,7 milyon manat) Gürcüstan vətəndaşlarının payına düşüb.
Azərbaycanda adambaşına düşən turizm gəlirləri 2025-ci ilin ilk 11 ayında 173 dollar olub.

Elnur Əli