Suriya keçid hökumətinin təhlükəsizlik qüvvələri keçmiş İslam Dövləti (İŞİD) yaraqlılarının ailə üzvlərinin saxlanıldığı Əl-Hol xüsusi düşərgəsini, eləcə də ölkənin şimal-şərqindəki əvvəllər kürd koalisiyası tərəfindən idarə edilmiş bütün həbsxanaları tam nəzarətə götürməyə hazırlaşır.
Yeniavaz.com xəbər verir ki, bu barədə Ərəb Respublikasının Müdafiə Nazirliyi məlumat yayıb.
“Əl-Hol düşərgəsini və bölgədəki bütün İŞİD həbsxanalarını nəzarətə götürməyə hazır olduğumuzu bəyan edirik”, - məlumatda deyilir.
Xatırladaq ki, daha əvvəl kürd koalisiyası olan Suriya Demokratik Qüvvələri (SDQ) qüvvələrini Əl-Hol düşərgəsindən çıxardığını açıqlamışdı.
Qeyd edək ki, Əl-Hol düşərgəsi 2019-cu ildə Fərat çayının şərq sahilindəki Əl-Bağuzda İŞİD terrorçu qrupunun postunun məğlub edilməsindən sonra yaradılıb. Keçmiş yaraqlıların ailələri ora göndərilib. 2019-cu ildə əhalisi təxminən 73 min nəfər olub. Müxtəlif hesablamalara görə, 2025-ci ilə qədər əsasən İraq vətəndaşlarından ibarət təxminən 50 min qaçqın orada qalıb.
Tətbiqimizi yükləyə bilərsiniz
