Bağırsaq ətrafındakı yağ toxuması immun sistemində aktiv rol oynayır

İsveçdə yerləşən “Karolinska Institute”, Danimarkanın Steno Diabet Mərkəzi və Almaniyada Helmholtz Münhen İnstitutunun alimləri tərəfindən aparılan yeni genişmiqyaslı tədqiqat göstərib ki, bağırsaq nahiyəsində yerləşən yağ toxuması yalnız enerji ehtiyatı deyil, həm də immun və iltihabi proseslərdə fəal iştirak edən aktiv bir orqandır.
Yeniavaz.com xəbər verir ki, araşdırmanın nəticələri nüfuzlu elmi jurnal olan “Cell Metabolism”də dərc olunub.
Alimlər ağır dərəcəli piylənməsi olan insanların qarın boşluğundakı müxtəlif yağ depolarını təhlil ediblər. Məlum olub ki, yoğun bağırsağa bitişik yerləşən epiploik yağ toxuması digər yağ növlərindən, xüsusilə də dərialtı yağ toxumasından ciddi şəkildə fərqlənir.
Tədqiqat göstərib ki, bu nahiyədə iltihabi proseslərlə əlaqəli yağ hüceyrələri və çoxsaylı immun hüceyrələri üstünlük təşkil edir. Bu isə epiploik yağ toxumasının bağırsağın immun sistemi ilə daha sıx qarşılıqlı əlaqədə olduğunu göstərir.
Laboratoriya şəraitində aparılan eksperimentlər zamanı müəyyən edilib ki, bağırsaq mikrobiotasından gələn siqnallar yağ hüceyrələrini immun hüceyrələri aktivləşdirən maddələr ifraz etməyə sövq edə bilir. Bu fakt yağ toxumasının yalnız passiv enerji yığımı ilə məhdudlaşmadığını, xüsusilə bağırsağa yaxın zonalarda immun-metabolik proseslərin aktiv iştirakçısı olduğunu sübut edir.
Alimlərin fikrincə, bağırsaq mikrobiotası ilə yağ toxuması arasındakı bu qarşılıqlı təsir iltihabi reaksiyaları gücləndirə, nəticədə piylənmə və onunla əlaqəli metabolik pozuntuların müalicəsini çətinləşdirə bilər.
Tədqiqat müəllifləri vurğulayırlar ki, əldə olunan nəticələr yağ toxumasına baxışı dəyişir: o, sadəcə piy anbarı deyil, immunitetin və maddələr mübadiləsinin tənzimlənməsində iştirak edən mürəkkəb bir orqandır. Eyni zamanda, bu xüsusiyyətlərin normal çəkiyə malik insanlarda nə dərəcədə mövcud olduğu hələlik məlum deyil.
Növbəti mərhələdə alimlər epiploik yağ toxumasının Kron xəstəliyi və xoralı kolit kimi bağırsağın iltihabi xəstəliklərinə təsirini araşdırmağı planlaşdırırlar.