ABŞ daha bir tankeri ələ keçirdi

Birləşmiş Ştatlar Karib dənizində sanksiya tətbiq edilmiş “kölgə donanmasına” aid daha bir tankeri ələ keçirib.
Yeniavaz.com xəbər verir ki, bu barədə ABŞ Cənub Komandanlığı məlumat yayıb.
Bildirilib ki, “milləti olmayan” “Sophia” adlı tanker beynəlxalq sularda olub və qanunsuz fəaliyyətlə məşğul olub.
ABŞ Sahil Mühafizəsi tankerin taleyi ilə bağlı yekun qərar vermək üçün onu müşayiət edir.
“Reuters” mənbələrinin məlumatına görə, gəmi Panama bayrağı altında olub. Onlar iddia edirlər ki, tanker yanvarın əvvəlində Venesuela neftini Çinə daşıyan “kölgə donanmasının” bir hissəsi kimi Venesuela sularını tərk edib. Bununla belə, iki “CBS News” mənbəsi gəminin Kamerun bayrağı altında olduğunu iddia edir.
Tankerin Rusiya ilə əlaqəsi olub-olmadığına aydınlıq gətirilməyib. ABŞ Daxili Təhlükəsizlik Naziri Kristi Noem tərəfindən verilən açıqlamada, ABŞ qüvvələri tərəfindən həmçinin ələ keçirilən, lakin Şimali Atlantik Okeanında olan Rusiya bayraqlı neft tankeri “Bella 1” (“Marinera”) ilə birlikdə qeyd edilib.
Panama bayraqlı “Sofia” adlı tanker 2025-ci il oktyabrın 1-də ABŞ sanksiyalarına məruz qalıb. Həmin vaxt ABŞ Maliyyə Nazirliyinin tətbiq etdiyi məhdudiyyətlər siyahısında Rusiya və Venesuela gəmiçilik şirkətləri və bir sıra gəmilər var idi.