Çendu Tibb Kollecinin alimləri müəyyən ediblər ki, müntəzəm olaraq sitrus meyvələri, pomidor, giləmeyvə, qovun və süd məhsulları istehlak etmək böyrək daşları riskini azalda bilər.
Yeniavaz.com xəbər verir ki, araşdırmanın nəticələri “Frontiers in Nutrition” jurnalında dərc olunub.
Təhlilə 2007-ci ildən 2020-ci ilə qədər ABŞ Milli Sağlamlıq və Qidalanma Müayinə Sorğusunun məlumatları daxil edilib. Tədqiqatda ümumilikdə 26 min böyüklər iştirak edib və onlar müntəzəm olaraq öz pəhrizlərində və sidik yollarının sağlamlığında dəyişikliklər barədə məlumat veriblər.
Nəticələr göstərdi ki, müntəzəm olaraq sitrus meyvələri, bostan meyvə-tərəvəzləri, giləmeyvə və pomidorlardan istifadə edən insanlarda böyrək daşı riski daha azdır. Bənzər bir təsir süd və süd məhsulları istehlak edənlərdə müşahidə edildi. Əksinə, əlavə şəkərin yüksək qəbulu böyrək daşları riskinin artması ilə əlaqələndirildi:
“Meyvə və tərəvəzlərin tərkibində kalium və üzvi turşular var ki, bu da sidikdə duzların kristallaşmasını azaldır. Süd məhsulları kalsiumla təmin edir, bağırsaqda oksalatların sorulmasını azaldır. Şəkər isə maddələr mübadiləsini poza və sidikdə kalsiumun xaric olmasını artıra bilər”, - alimlər izah ediblər.
Müəlliflər tədqiqatın müşahidə xarakteri daşıdığını və birbaşa səbəb-nəticəyə imkan vermədiyini vurğulayıblar. Buna baxmayaraq, nəticələr balanslaşdırılmış və yüksək keyfiyyətli pəhrizin böyrək daşının qarşısının alınması üçün vacib olduğunu təsdiqləyir.
Tətbiqimizi yükləyə bilərsiniz
