Tramp Qəzza zolağında türk hərbçilərinin yerləşdirilməsinə etiraz etmir

ABŞ Prezidenti Donald Tramp Qəzza zolağında türk hərbçilərinin yerləşdirilməsinə etiraz etməyəcəyini bəyan edib.
Yeniavaz.com xəbər verir ki, o, bu mövqeyini Florida ştatının Uest Palm Biç yaxınlığındakı Mar-a-Laqo malikanəsində İsrailin Baş naziri Benyamin Netanyahu ilə danışıqların əvvəlində jurnalistlərin suallarını cavablandırarkən bildirib.
“Çox şey Bibidən (Benyamin Netanyahu - red.) asılı olacaq. Biz bunu müzakirə edəcəyik. Əgər hər şey qaydasındadırsa (İsrail rəhbərliyinin nöqteyi-nəzərindən), o zaman düşünürəm ki, bu, yaxşı olardı”, - Tramp bildirib.
Dekabrın 11-də Türkiyənin xarici işlər naziri Hakan Fidan Qətərin “Əl-Cəzirə” telekanalına müsahibəsində deyib ki, Ankara Fələstin probleminin həlli üçün məsuliyyəti öz üzərinə götürə bilər və lazım gələrsə, Qəzza zolağına qoşun göndərməyə hazırdır.