Vaşinqtonda zəfər tağı tikiləcək

Amerikanın paytaxtı Vaşinqtonun dünyadakı bütün oxşar tikililəri geridə qoyacaq öz zəfər tağı olacaq.
Yeniavaz.com xəbər verir ki, bu barədə ABŞ Prezidenti Donald Tramp Ağ Evdə keçirilən tədbirdə bildirib.
“Vaşinqton dünyada zəfər tağı olmayan yeganə böyük şəhərdir. Ancaq bu zəfər tağı bütün digər şəhərlərdəki zəfər tağlarını geridə qoyacaq”, - Tramp qeyd edib.
Onun sözlərinə görə, tağın tikintisi Arlinqton körpüsünün qarşısında, ABŞ prezidenti Avraam Linkolnun memorialının əks tərəfində aparılır.
“Bu, elə bir şey olacaq ki, Parisdəkilərə bənzəyəcək, ancaq açığı, hər cəhətdən Paris variantını üstələyəcək”, - ABŞ Prezidenti əlavə edib.
Qeyd edək ki, oktyabr ayında ABŞ Protokol Xidmətinin rəisi Monika Krouli də Trampın təklifi ilə Vaşinqtonda ölkənin 250 illik yubileyi ilə əlaqədar zəfər tağının ucaldılacağını və tağın Arlinqton qəbiristanlığı ilə Linkoln Memorialı arasında yerləşəcəyini bildirmişdi.