ATƏT Minsk Qrupunun buraxılması prosesini başa çatdırdı

ATƏT Minsk Prosesini və onunla əlaqəli strukturları bağlayıb.
Yeniavaz.com xəbər verir ki, bu barədə təşkilatın bəyanatında bildirilib.
“ATƏT Minsk Prosesinin və əlaqədar strukturların bağlanması üzrə işini Ermənistan və Azərbaycanın ATƏT-in sədrliyinə birgə müraciətindən sonra 1 sentyabr 2025-ci il tarixində qəbul edilmiş Nazirlər Şurasının qərarına uyğun olaraq 30 noyabr 2025-ci il tarixində saat 23:59-da başa çatdırıb”, - bəyanatda qeyd edilib.
Həmçinin, bəyanatda qeyd edilib ki, bütün zəruri inzibati prosedurların başa çatdırılması bağlanma prosesinin başa çatması deməkdir.
“Bu proses 2025-ci il avqustun 8-də Vaşinqtonda ABŞ Prezidenti Donald Trampın, Azərbaycan Prezidenti İlham Əliyevin və Ermənistanın Baş naziri Nikol Paşinyanın iştirakı ilə imzaladığı tarixi Birgə Bəyannamənin ardınca qəbul edilmiş, sentyabrın 1-də ATƏT-in 57 iştirakçı dövlətinin hamısının konsensus qərarının icrası idi”, - mətndə bildirilib.
Qeyd edək ki, ATƏT-in Minsk Qrupu 1992-ci ildə yaradılıb və ona Rusiya, Fransa və ABŞ sədrlik edib.