Andrey Yermakın vəzifəsindən azad edilməsindən sonra Ukrayna Prezidenti Volodimir Zelenskinin yeni ofisinin rəhbəri vəzifəsinə 6 namizəd nəzərdən keçirilir.
Yeniavaz.com xəbər verir ki, bu barədə “RBK-Ukrayna” agentliyi mənbələrə istinadla məlumat yayıb.
Onun sözlərinə görə, ən çox müzakirə olunan dörd namizəd var: müdafiə naziri Denis Şmıqal, baş nazirin birinci müavini və rəqəmsal transformasiya naziri Mixail Fyodorov, Müdafiə Nazirliyinin Baş Kəşfiyyat İdarəsinin rəisi Kirill Budanov və Zelenskinin ofisinin rəhbərinin müavini Pavel Palisa.
Başqa bir mənbə iddia edir ki, bu dörd namizəddən başqa daha iki namizəd var. Lakin onların adları açıqlanmır.
Agentlik qeyd edir ki, Zelenski ezamiyyətdə olduğu üçün ofis rəhbəri vəzifəsi ən azı dekabrın 3-dək vakant qalacaq.
“Ukrainska Pravda” nəşri isə yazır ki, Fyodorov, Şmıqal və Palisa ən etibarlı namizədlərdir. Bununla belə, ofisin rəhbəri vəzifəsinin ABŞ ilə danışıqlarda iştirak edən xarici işlər nazirinin birinci müavini Sergey Kislitsaya təklif oluna biləcəyi istisna edilmir.
Eyni zamanda, nəşr Baş nazir Yuliya Sviridenkonun bu vəzifəyə təyin olunmasını qeyri-mümkün adlandırır, baxmayaraq ki, o, ilkin olaraq namizədlər sırasındadır.
Nəşr qeyd edir ki, bu halda kabineti yenidən formalaşdırmaq həddən artıq zəhmət tələb edəcək.
Tətbiqimizi yükləyə bilərsiniz
