Şri-Lankanın hakimiyyət orqanları ölkəni viran qoyan güclü “Ditva” siklonundan sonra paytaxt Kolombonun bir sıra ərazilərində artan sel suları ilə mübarizəni davam etdirir.
Yeniavaz.com AFP-yə istinadən xəbər verir ki, fırtına və ona müşayiət edən bir həftəlik leysan yağışları ölkə üzrə ən azı 159 nəfərin ölümünə səbəb olub.
Fəlakətlərin İdarə Edilməsi Mərkəzi (DMC) bildirir ki, Kelani çayında suyun səviyyəsi hələ də yüksəlir və bu da Kolombonun şimalında genişmiqyaslı daşqınlara gətirib çıxarıb. Rəsmilər əlavə edir ki, daha 203 nəfər itkin düşmüş hesab olunur.
Prezident Anura Kumara Dissanayake şənbə günü ölkədə fövqəladə vəziyyət elan edib və beynəlxalq ictimaiyyətdən təcili yardım tələb edib. İlk reaksiya Hindistandan gəlib – xilasetmə əməliyyatlarına dəstək üçün iki helikopter və humanitar yardım göndərilib. Yaponiya da ilkin qiymətləndirmə qrupu göndərəcəyini və əlavə yardım göstərəcəyini açıqlayıb.
DMC bildirir ki, yağışlar dayansa da, xüsusən də ölkənin mərkəzi əyalətində bir çox yollar hələ də bağlanıb, bölgələrə giriş mümkünsüzdür. Yüz minlərlə insan köməksiz qalıb. 20 mindən çox ev dağılıb, 122 min nəfər hökumətin müvəqqəti sığınacaqlarına yerləşdirilib. Evlərini tərk etmək məcburiyyətində qalan təxminən 833 min insanın humanitar yardıma ehtiyacı var.
Hərbi qüvvələr, donanma və hava qüvvələri mülki qurumlarla birlikdə fəlakətin nəticələrinin aradan qaldırılması işlərinə cəlb olunub.
Rəsmilər bildirir ki, elektrik xətlərinin sıradan çıxması və su basmış çirkab suların təmizləyici qurğularının fəaliyyətsiz qalması səbəbindən ölkənin təxminən üçdə biri işıqsız və susuz qalıb. İnternet əlaqəsi də geniş şəkildə kəsilib.
“Ditva” siklonu 2017-ci ildən bəri Şri-Lankada baş vermiş ən ölümcül təbii fəlakət kimi qeydə alınıb. Ümumilikdə ölkədə ən dağıdıcı daşqın isə 2003-cü ilin iyununda baş verib və o zaman 254 nəfər həlak olub.
Tətbiqimizi yükləyə bilərsiniz
