Rusiya Kiyevə kütləvi hücum etdi − Ölən və yaralananlar var

Noyabrın 29-na keçən gecə Rusiya ordusu Kiyevə geniş raket və pilotsuz təyyarə zərbələri endirib.
Yeniavaz.com xəbər verir ki, bu barədə şəhər meri Vitali Kliçko məlumat yayıb.
Bildirib ki, hücum nəticəsində Ukrayna paytaxtının bir neçə rayonunda yaşayış binalarına ziyan dəyib.
Son məlumatlara görə, 2 nəfər ölüb, 27 nəfər yaralanıb. Biri uşaq olmaqla 17 nəfər xəstəxanaya yerləşdirilib.
Kliçkonun sözlərinə görə, Kiyev vilayətinin beş rayonu da vurulub.
Brovari rayonunda 6 çoxmərtəbəli yaşayış binasına ziyan dəyib. Binadan 52 nəfər təxliyə edilib.
Ukrayna Energetika Nazirliyi bildirib ki, Rusiyanın zərbəsi nəticəsində 500 mindən çox Kiyev sakini işıqsız qalıb.
Ukrayna Hərbi Hava Komandanlığının məlumatına görə, Rusiya qüvvələri bir gecədə Ukrayna ərazisinə 36 qanadlı və ballistik raket, həmçinin 596 müxtəlif tipli pilotsuz uçan aparat atıb.
Rusiya Müdafiə Nazirliyi Kiyevə vurduğu kütləvi zərbəni “Ukraynanın Rusiya ərazisindəki mülki hədəflərə terror hücumlarına cavab” adlandırıb.