Yermak cəbhəyə gedir

Ukrayna Prezidenti Volodimir Zelenskinin ofisinin keçmiş rəhbəri Andrey Yermak istefasından bir neçə saat sonra cəbhəyə getmək istədiyini bildirib.
Yeniavaz.com xəbər verir ki, bu barədə “The New York Post” qəzeti Yermakdan aldığı məktuba istinadla məlumat yayıb.
“Mən cəbhəyə gedirəm və istənilən repressiyaya hazıram”, - deyə qəzet Yermakın sözlərindən sitat gətirib.
O, Zelenskiyə problem yaratmaq istəmədiyini, buna görə də, cəbhə xəttinə getməyə qərar verdiyini bildiri.
Prezident aparatının keçmiş rəhbərinin sözlərinə görə, o, evində korrupsiyaya qarşı mübarizə orqanlarının apardığı axtarışlarla təhqir edilib.
Bundan əlavə, Yermakın sözlərinə görə, onun ləyaqəti qorunmayıb.
Yermak cəbhə xəttinə nə vaxt və necə gedəcəyi ilə bağlı təfərrüatları açıqlamayıb.
Qeyd edək ki, noyabrın 28-də Ukraynanın Korrupsiyaya Qarşı Mübarizə üzrə Milli Bürosunun və İxtisaslaşdırılmış Korrupsiyaya Qarşı Mübarizə Prokurorluğununə məkdaşlarının onun evində axtarış aparmasından sonra o, istefa verib. Ukrayna Prezidenti Volodimir Zelenski noyabrın 28-də axşam onun istefasını qəbul edib.
Yermaka hələ ki, rəsmi ittiham irəli sürülməyib.
Xatırladaq ki, 54 yaşlı Yermak 2020-ci il fevralın 11-dən Ukrayna prezident aparatının rəhbəri vəzifəsini icra edib. Bundan əvvəl o, Zelenskinin xarici siyasət və beynəlxalq əlaqələrə nəzarət edən köməkçisi olub. Yermak son vaxtlar Kiyevin Ukrayna münaqişəsinin nizamlanması üzrə danışıqlar qrupuna rəhbərlik edib.