Hazırda fəaliyyətini dayandırmış “Milburn” şirkəti tərəfindən istehsal olunan “Electric 27L” elektromobili “Bring a Trailer” platformasında hərraca çıxarılıb.
Yeniavaz.com xəbər verir ki, elektromobil 1920-ci ildə istehsal edilib.
Avtomobil üçün qoyulan ilkin qiymət 30 min dollar olub.
Satışa çıxarılan nümunə arxa təkərləri ötürücü val vasitəsilə idarə edən, təyin olunmamış at gücünə malik “General Electric” mühərriki ilə təchiz edilib.
Mühərrik avtomobilin ön və arxa hissəsində yerləşən beş ədəd 12 voltluq akkumulyatorla qidalanır.
“Electric 27L” xüsusi qol vasitəsilə idarə olunur və əyləc həm ənənəvi barabanlı əyləclərdən, həm də müasir regenerativ əyləc sisteminə bənzər sistemdən istifadə etməklə həyata keçirilir.
Taxta və parça ilə işlənmiş interyerdə əsas oturacaq və hərəkətin əks istiqamətinə baxan iki qatlanan oturacaq var.
Avtomobil son illərinin bir hissəsini Amerika tematik muzeyində keçirib. 2002-ci ildən şəxsi kolleksiyada saxlanılıb. Üç il əvvəl isə indiki sahibi tərəfindən alınıb.
Nadir nəqliyyat vasitəsi 64 min dollara satılıb.
Qeyd edək ki, “Milburn” 1870-ci illərdə vaqon istehsal edib. Lakin daha sonra avtomobil kuzov istehsalına keçib. 1914-cü ildə o, elektromobil istehsalına başlayaraq, özü avtomobil istehsalçısına çevrilib. “Milburn” 1923-cü ilə qədər mövcud olub.
Tətbiqimizi yükləyə bilərsiniz
