BMT dünyada aclıq çəkənlərin sayını açıqladı

2024-cü ildə təxminən 673 milyon insan aclıqdan əziyyət çəkib, daha 2,3 milyard insan isə qida çatışmazlığı ilə üzləşib.
Yeniavaz.com xəbər verir ki, bu barədə BMT Baş Assambleyasının 80-ci sessiyasının sədri Annalena Berbok BMT-nin Sosial İnkişaf Sammiti ərəfəsində Qətərin paytaxtında baş tutan Aclıq və Yoxsulluğa Qarşı Qlobal Alyans liderlərinin ilk iclasında bildirib.
Onun sözlərinə görə, dünya təşkilatı iqlim dəyişikliyi nəticəsində yaranan yeni aclıq və yoxsulluq ocaqlarını sənədləşdirir.
“İqlimdəki qeyri-sabitlik aclığa və yoxsulluğa gətirib çıxarır. Onlar miqrasiya və münaqişələrə səbəb olur, münaqişələr isə aclıq və yoxsulluğu daha da artırır”, - o qeyd edib.
Berbok bildirib ki, aclıqla mübarizə təkcə xeyriyyəçilik aktı deyil, həm də təhlükəsizlik məsələsidir.
Qeyd edək ki, noyabrın 4-6-da Qətərin dəstəyi və BMT-nin təşkilatçılığı ilə Dohada Sosial İnkişaf üzrə İkinci Dünya Sammiti keçiriləcək. İştirakçılar yoxsulluqla mübarizə aparmaq, sosial ədaləti gücləndirmək və bərabərliyi təşviq etmək üçün tədbirləri müzakirə edəcəklər.