ABŞ Federal Ehtiyat Sistemi (FED) bu il ikinci dəfə əsas faiz dərəcəsini 25 baza bəndi azaldaraq illik 3,75–4% aralığına endirib.
Yeniavaz.com xəbər verir ki, FED bu qərarı iqtisadi fəallığın mülayim templə artması və inflyasiyanın yüksəlməsilə əlaqələndirib.
FED həmçinin vurğulayıb ki, işsizlik nisbəti bir qədər artsa da, avqusta qədər aşağı səviyyədə qalıb.
Məlumata görə, sentyabrda keçirilən əvvəlki iclasda FED son doqquz ayda ilk dəfə faiz dərəcəsini 4,25–4,5%-dən 4–4,25%-ə endirib.
“Bloomberg” agentliyi yazır ki, ABŞ hökumətinin bağlanması səbəbindən iqtisadi məlumatların dərcinin dayandırılması vəziyyəti daha da qeyri-müəyyən edib. Agentliyin iqtisadçıları hesab edirlər ki, bu şəraitdə FED-in verdiyi qərar sonradan peşmanlıq doğura bilər. Onların sözlərinə görə, investorlar və biznes rəhbərləri də az məlumatla qərar verməyə məcbur qalırlar.
Bununla yanaşı, ABŞ Prezidenti Donald Tramp əvvəllər dəfələrlə FED-i faiz dərəcələrini azaltmağa çağırıb. Avqust ayında o, Federal Ehtiyat Sisteminin qubernatorlar şurasının üzvü Liza Kukun işdən çıxarılmasını elan edib. Kuka qarşı ipoteka fırıldaqçılığı ilə bağlı təhqiqat başladılıb. ABŞ məhkəməsi hələlik onun özünü müdafiə hüququna malik olduğunu və vəzifəsində qalacağını qərara alıb.
Ümumilikdə, FED-in bu addımı ABŞ iqtisadiyyatı üçün daha yumşaq pul siyasətinə keçidin davamı kimi qiymətləndirilir.
Ekspertlər bildirirlər ki, bu addım kreditləşməni və sərmayəni stimullaşdıraraq iqtisadi aktivliyi qısamüddətli dövrdə dəstəkləyə bilər, lakin eyni zamanda inflyasiya risklərini artırır və iqtisadi yavaşlama qorxusunu gücləndirir. Faizlərin azalması dolların gəlirliliyini aşağı saldığı üçün valyuta bazarlarında dolların zəifləməsi gözlənilir. Ümumilikdə, bu qərar dünya üzrə maliyyə şərtlərini bir qədər rahatlaşdıracaq, inkişaf etməkdə olan ölkələrə kapital axınını gücləndirə, amma uzunmüddətli perspektivdə inflyasiya təzyiqlərini artıraraq yeni balans axtarışına səbəb ola bilər.
Tətbiqimizi yükləyə bilərsiniz
