Gümrü şəhərinin meri Vardan Qukasyan yeni cinayətlərdə ittiham olunub.
Yeniavaz.com “Sputnik Ermənistan”a istinadla xəbər verir ki, bu barədə onun vəkilləri açıqlama yayıb.
Müdafiə tərəfinin sözlərinə görə, ittihamlar Qukasyanın sentyabrın 16-sı və 23-də Korrupsiyaya Qarşı Mübarizə Məhkəməsinin həyətində verdiyi ifadələrdən irəli gəlir. Bu ifadələr müstəntiqlər tərəfindən “ölkənin suverenliyindən imtina etməyə açıq çağırışlar” (Cinayət Məcəlləsinin 422-ci maddəsi) kimi təsnif edilib.
Vəkillər ittihamları siyasi motivli hesab edirlər.
Onların sözlərinə görə, zorakılıq əlamətləri daşımayan və şəxsi rəy şəklində verilən bəyanatlar beynəlxalq standartlara, o cümlədən Avropa İnsan Hüquqları Məhkəməsinin prinsiplərinə uyğun olaraq cinayət sayıla bilməz.
Qeyd edək ki, oktyabrın 20-də təhlükəsizlik qüvvələri Gümrü şəhər meriyasında axtarış aparıblar. Daha sonra Qukasyan və daha 7 nəfərin rüşvət almaqda şübhəli bilindikəri üçün saxlanılıblar. Əməliyyat zamanı mer tərəfdarları binanı mühasirəyə alıblar. Hadisə yerinə polis qüvvələri, o cümlədən xüsusi təyinatlı dəstələri cəlb edilib.
Xatırladaq ki, oktyabrın 21-də məhkəmə onun barəsində iki aylıq həbs-qətimkan tədbiri seçib. Hadisədən sonra Gümrü meriyasının qarşısında “kütləvi iğtişaşlar”la bağlı cinayət işi açılıb.
Tətbiqimizi yükləyə bilərsiniz
