“Türkiyə ilə çox yaxşı dialoqumuz var” − Mirzoyan

“Türkiyə ilə bir çox səviyyələrdə çox yaxşı dialoqumuz var: liderlər, xarici işlər nazirləri, xüsusi nümayəndələr və texniki qruplar arasında”.
Yeniavaz.com xəbər verir ki, bunu DW-yə müsahibəsində Ermənistanın xarici işlər naziri Ararat Mirzoyan deyib.
“Müxtəlif nazirlikləri demirəm. Dialoq heç bir ilkin şərt olmadan olub və davam edir. Eyni zamanda, türkiyəli həmkarlarımız Ermənistan-Azərbaycan münasibətləri normallaşmayana qədər prosesi başa çatdıra bilməyəcəklərini - sərhədlərin açılması və diplomatik münasibətlərin qurulmasını da vurğulayırlar”, - Mirzoyan deyib.
Nazir qeyd edib ki, bu artıq baş verib: 
“İndi bu həyata keçirilib. Ermənistan-Azərbaycan sülh sazişi paraflanıb. Onun mətni ilə bağlı heç bir mübahisə yoxdur. Mən şəxsən nə Ermənistan-Türkiyə sərhədinin açılmasında, nə də Ermənistan-Türkiyə diplomatik münasibətlərinin qurulmasında heç bir problem görmürəm. Bunu türkiyəli həmkarlarımız da təsdiqləyiblər. Onlar hazır olduqlarını bildirirlər və faktiki olaraq sərhədləri açmağa, dəmir yolu xidmətini bərpa etməyə, birbaşa ikitərəfli ticarəti bərpa etməyə hazır olduqlarını nümayiş etdirirlər. Ona görə də mən inanıram ki, qarşıdakı həftələrdə və aylarda bu istiqamətdə çox nəzərəçarpacaq irəliləyiş əldə edəcəyik”.