ABŞ və Çin rəsmiləri bazar günü Madriddə danışıqlara başlayıblar.
Yeniavaz.com xəbər verir ki, bu barədə “Reuters” məlumat yayıb.
Bildirilib ki, bu danışıqlar onların gərgin ticarət münasibətləri, TikTok-un satışına qoyulmuş yaxınlaşan son tarix, həmçinin Rusiyadan neft alışı səbəbindən Çinə qarşı gömrük rüsumları tətbiq etmək barədə Vaşinqtonun müttəfiqlərinə etdiyi tələblərlə bağlı olub.
ABŞ maliyyə naziri Skott Besent və ABŞ-nin ticarət nümayəndəsi Ceymison Qriri Çinin vitse-premyeri Xe Lifendən və danışıqlarda Çinin baş ticarət nümayəndəsi Li Çenqandan bir qədər əvvəl danışıqların keçirildiyi İspaniyanın Xarici İşlər Nazirliyinin iqamətgahı olan Santa Kruz sarayına gəliblər.
Bu, son dörd ay ərzində tərəflərin Avropa şəhərlərində toplandıqları dördüncü görüşdür. Məqsəd isə ABŞ ilə Çin arasında ticarət münasibətlərinin ABŞ prezidenti Donald Tramp tərəfindən tətbiq olunmuş gömrük rüsumları səbəbindən dağılmasının qarşısını almaqdır.
Sonuncu dəfə nümayəndə heyətləri iyul ayında Stokholmda görüşmüş və prinsipcə 90 gün müddətinə ticarət atəşkəsinin uzadılması barədə razılığa gəlmişdilər. Bu addım yüksək faizli gömrük rüsumlarının əhəmiyyətli dərəcədə azalmasına və Çindən ABŞ-yə nadir torpaq minerallarının tədarükünün bərpasına səbəb olmuşdu.
Tramp təsdiqləyib ki, ABŞ Çindən idxal olunan mallara mövcud gömrük rüsumlarını noyabrın 10-dək, ümumilikdə təxminən 55 faiz dərəcə ilə uzadacaq. Ticarət ekspertləri bildiriblər ki, İspaniya tərəfindən təşkil olunan danışıqlarda əhəmiyyətli irəliləyiş gözlənilmir, baxmayaraq ki, son illərdə Madrid Pekinlə münasibətləri yaxşılaşdırmağa çalışır.
Madriddəki danışıqların ən real nəticəsi TikTok-un Çinli sahibi “ByteDance” şirkətinin ABŞ-də fəaliyyətini dayandırmaq üçün son tarixinin sentyabrın 17-dək növbəti dəfə uzadılması ola bilər. Əks halda tətbiq ABŞ-də bağlana bilər.
Tramp administrasiyasında TikTok-un gələcəyi ilə bağlı müzakirələrlə tanış olan mənbə bildirib ki, sövdələşmə gözlənilmir, lakin son tarix dördüncü dəfə uzadılacaq.
Tətbiqimizi yükləyə bilərsiniz
