İsrail Qəzzada atəşkəs təklifini qəbul etdi

İsrail ABŞ Prezidenti Donald Trampın Qəzzada atəşkəslə bağlı irəli sürdüyü təklifi qəbul edib.
Yeniavaz.com “Reuters” agentliyinə istinadla xəbər verir ki, bu barədə İsrailin xarici işlər naziri Gideon Saar Budapeştdə macar həmkarı Peter Siyarto ilə ilə keçirdiyi mətbuat konfransında bildirib.
Saar, israilli girovların azad edilməsini və Fələstinin HƏMAS hərəkatının tərksilah olunmasını ehtiva edən müharibənin dayandırılması ilə bağlı tammiqyaslı sazişi qəbul etməyə hazır olduqlarını deyib.
Qeyd edək ki, ABŞ Prezidenti Donald Tramp HƏMAS-a sonuncu dəfə xəbərdarlıq edərək, ABŞ-nin atəşkəs təklifini qəbul etməyi tələb edib. Tramp söhbətin hansı şərtlərdən getdiyini dəqiqləşdirməyib.
İsrail mediasının yazdığına görə, HƏMAS-ın atəşkəsin ilk günündə İsrail həbsxanalarında saxlanılan minlərlə fələstinli məhbusun müqabilində israilli girovları azad edəcəyi gözlənilir. Daha sonra uzunmüddətli sülhə dair danışıqlara başlanılması planlaşdırılır. Fələstin tərəfi də öz növbəsində İsrail qoşunlarının anklavdan tamamilə çıxarılmasını tələb edir.