“Qərb ölkələrinin nümayəndələri Rusiyaya qarşı ikinci cəbhə açacaqları təqdirdə Gürcüstan hakimiyyətini silahla təmin etməyi təklif ediblər”.
Yeniavaz.com xəbər verir ki, bu barədə jurnalistlərə hakim “Gürcü arzusu - Demokratik Gürcüstan” partiyasının baş katibi, Tbilisi meri Kaxa Kaladze danışıb.
“Gürcüstanın baş nazirinin kabinetində birbaşa təhdidlər, şantaj və təhqirlər olub ki, ölkədə ikinci cəbhə açılsın. Onlar söz veriblər ki, hamıya kömək edəcəklər, müvafiq hərbi texnika ilə təmin edəcəklər və s.” - Kaladze deyib.
Onun sözlərinə görə, zərurət yaranarsa, sübutların təqdim edilməsi zəruri olarsa, hakimiyyət danışıqların təfərrüatlarını açıqlamağa hazırdır:
“Lakin ölkənin maraqlarından çıxış edərək, hər şeyi olduğu kimi buraxmaq daha yaxşıdır”.
Qeyd edək ki, 2022-ci il fevralın 25-də Gürcüstanın o zamankı baş naziri İrakli Qaribaşvili Ukraynada başlayan müharibəyə görə Rusiyaya qarşı sanksiyalar tətbiq etməyi planlaşdırmadığını bəyan edərək, bunu milli maraqlarla izah edib. Gürcüstan hökumətinin bu qərarı müxalifət tərəfindən tənqid edilib, respublika hakimiyyətini Rusiya Federasiyası ilə əməkdaşlıqda ittiham edib. Bundan əlavə, hakim partiyanın rəhbərliyi tez-tez Ukrayna hakimiyyətini və bəzi avropalı siyasətçiləri Gürcüstan ərazisində ikinci cəbhə açmağa çalışmaqda ittiham edib. Onların fikrincə, müəyyən qüvvələr Rusiyanı orada paralel hərbi əməliyyatlar aparmağa təhrik etmək niyyətindədir.
Tətbiqimizi yükləyə bilərsiniz
