ABŞ Böyük Britaniyada nüvə silahı yerləşdirib – “Bloomberg”

ABŞ 2008-ci ildən bəri ilk dəfə olaraq Böyük Britaniya ərazisində nüvə silahı yerləşdirib.
Yeniavaz.com xəbər verir ki, “Bloomberg” agentliyi bu barədə hərbi analitiklərə və açıq mənbələrə istinadən məlumat yayıb.
Məlumata görə, iyulun 16-da ABŞ Hərbi Hava Qüvvələrinə məxsus C-17 tipli hərbi-nəqliyyat təyyarəsi, Nyu-Meksiko ştatının Albukerke şəhərində yerləşən Kirtland Hərbi Hava Bazasından havalanaraq, Böyük Britaniyanın Lakenheath hərbi bazasına eniş edib. Uçuşda transponderlərin açıq olması, analitiklərin fikrincə, Vaşinqtonun Moskvaya nüvə imkanlarını artırmaq niyyətində olduğunu nümayiş etdirmək cəhdidir.
Amerika Alimləri Federasiyasının Nüvə İnformasiya Layihəsinin direktoru Hans Kristensen bildirib ki, ABŞ-nin B61-12 tipli termonüvə bombalarını Böyük Britaniyaya qaytardığına dair “güclü sübutlar” mövcuddur.
Sakit Okean Forumunun baş elmi işçisi Villiam Alberque qeyd edib ki, bu addım NATO-nun çəkindirici mövqeyinin gücləndirilməsi üçün atılan ilk addımdır:
“Transponderlərin açıq olması, ABŞ-nin Rusiya qarşısında nüvə çəkindiriciliyindən geri çəkilmədiyini göstərmək üçündür”.
ABŞ və Böyük Britaniya hökumətləri nüvə silahlarının yeri və statusu ilə bağlı rəsmi şərh verməkdən imtina edirlər. Pentaqonun sənədlərinə əsasən, Lakenheath bazasında bir neçə ildir ki, nüvə təhlükəsizliyi sistemlərinin yerləşdirilməsi üçün “möhkəm obyektlərin” inşası həyata keçirilir.
B61-12 bombaları əvvəlki modellərlə müqayisədə daha dəqiq və çevikdir. Onların 0,3 ilə 50 kiloton arasında dəyişən döyüş başlıqları həm kiçik hərbi hədəflərə, həm də məskunlaşmış ərazilərə qarşı istifadə oluna bilər. “Bulletin of the Atomic Scientists” nəşri qeyd edir ki, bu bombalar F-35A qırıcıları da daxil olmaqla, müxtəlif NATO təyyarələrinə quraşdırıla bilər.
Xatırladaq ki, Böyük Britaniya iyun ayında ABŞ-dən ən azı 12 ədəd F-35A təyyarəsi alacağını bəyan edib. Britaniya Müdafiə Nazirliyi bu təyyarələrin NATO-nun nüvə missiyalarında istifadə olunacağını açıqlayıb.
Amerika Alimləri Federasiyasının məlumatına görə, B61-12 bombalarının Britaniyaya çatdırılması ilə ABŞ-nin taktiki nüvə silahları altı NATO ölkəsindəki yeddi hərbi bazaya yerləşdirilə bilər. Buna baxmayaraq, bu silahlardan istifadə yalnız ABŞ prezidentinin açıq icazəsi ilə mümkündür.

Murad Məmmədov