Tailand və Kamboca atəşkəs barədə razılığa gəldi

Tailand və Kamboca qeyd-şərtsiz atəşkəs barədə razılıq əldə edib.
Yeninavaz.com xəbər verir ki, bu barədə Malayziyanın Baş naziri Ənvər İbrahim Kuala-Lumpurda danışıqlardan sonra keçirilən mətbuat konfransında məlumat verib.
Onuun sözlərinə görə, Tailand və Kamboca arasında atəşkəs yerli vaxtla saat 00:00-da (Bakı vaxtı ilə saat 20:00) qüvvəyə minəcək.
Nümayəndə heyətləri arasında aparılan danışıqlar bir neçə saat davam edib.
Digər tərəfdən, Kambocanın baş naziri Hun Manet bildirib ki, Tailand və Kamboca arasındakı münaqişə nəticəsində hər iki tərəfdən 300 minə yaxın insan qaçqın düşüb.
“Döyüşlər nəticəsində çoxlu sayda ölən və yaralanan var. Ümumilikdə, hər iki tərəfdən 300 minə yaxın qaçqın düşüb. Kamboca tərəfində 140 min, Tailand tərəfində isə daha 160 min qaçqın var”, - o, Kuala-Lumpurda danışıqlardan sonra keçirilən mətbuat konfransında deyib.