“Ağ Evin kadrlar üzrə direktoru SSRİ-də anadan olub” – KİV

Ağ Evin kadrlar üzrə direktoru, 38 yaşlı Sergio Qor Özbəkistanda, Sovet İttifaqında anadan olub.
Yeniavaz.com xəbər verir ki, bu barədə OCCRP məlumat yayıb.
Qor mənşəyini açıqlamayıb. “Washington Post” qəzetinin məmur haqqında məqaləsində onun Maltadan olan mühacir olduğu qeyd edilib. Donald Tramp administrasiyasının rəsmisinin Malta mənşəli olması “New York Post” tabloidinin iyun nəşrində də qeyd edilib. Məmurun özü də qəzetə doğulduğu ölkəni açıqlamaqdan imtina edərək, bunun Rusiya olmadığını bildirib. Qorun tanışları “The Dispatch”ə onun SSRİ əsilli olduğunu bildiriblər. Ancaq bunun başqa heç bir sübutu yoxdur.
Nəşr müəyyən edib ki, Ağ Evin kadrlar üzrə direktoru Sergio Qorohovski adı ilə 30 noyabr 1986-cı ildə Daşkənddə anadan olub. Bu barədə məlumat Qorun Maltadakı daşınmaz əmlakına dair jurnalistlərin əldə etdiyi sənədlərdə var. Məmurun vəkili Robert Qarson müvəkkilinin Daşkənddə doğulduğunu təsdiqləyib.
Müstəntiqlərin fikrincə, Qor uşaqlıqda ən azı beş il Maltada yaşayıb. Xüsusilə, 1996-1999-cu illərdə Vittoriosa şəhərində oğlanlar üçün katolik məktəbində təhsil alıb. Daha sonra Qorun ailəsi ABŞ-yə mühacirət etdi və orada vətəndaşlıq aldı.
“Axios” nəşri Sergio Qoru Trampın Ağ Evdəki ən nüfuzlu məsləhətçilərindən biri adlandırıb. Qor ABŞ prezidenti Donald Trampın oğlu ilə birlikdə onun və tərəfdaşlarının kitablarını nəşr edən “Winning Team Publishing”i təsis edib. 2020-ci ildə Qor Trampın seçki kampaniyası zamanı vəsaitin toplanmasına cavabdeh idi və 2024-cü ildə o, ABŞ-nin hazırkı prezidentinin kampaniyasına təxminən 72 milyon dollar xərcləyən siyasi fəaliyyət komitəsi qurdu.