Azərbaycan Xarici İşlər Nazirliyi ABŞ-nin Texas ştatında daşqınlar nəticəsində ölənlərlə bağlı başsağlığı verib.
Yeniavaz.com xəbər verir ki, bu barədə nazirliyin “X” hesabında məlumat dərc olunub.
“ABŞ-nin Texas ştatının mərkəzini vuran daşqınlar nəticəsində çoxlu sayda insan ölümü və yaralanması bizi dərindən kədərləndirir. Biz ABŞ hökumətinə və bu faciədən əziyyət çəkən bütün insanlara ürəkdən başsağlığı veririk”, - məlumatda deyilir.
Qeyd edək ki, Texasda güclü yağışlar iyulun 4-nə keçən gecə Qvadalupe çayının məcrasından çıxmasına və daşmasına səbəb olub. Məlumata görə, suyun səviyyəsi cəmi 45 dəqiqə ərzində 8 metr yüksəlib.
Daşqınlar nəticəsində 15-i uşaq olmaqla 51 nəfər dünyasını dəyişib.
CNN-in məlumatına görə, onlarla insan itkin düşüb, lakin səlahiyyətlilər dəqiq rəqəm açıqlamayıb. İtkin düşənlər arasında çay sahilində yerləşən xristian yay düşərgəsi olan “Camp Mystic”dən olan 27 uşaq da var.
Tətbiqimizi yükləyə bilərsiniz
