ABŞ-nin İsraildəki səfirliyi və onun ölkədəki bütün nümayəndəlikləri iyunun 20-si daxil olmaqla, cümə gününə qədər bağlı olacaq.
Yeniavaz.com xəbər verir ki, bu barədə diplomatik nümayəndəliyin rəsmi saytında dərc edilmiş məlumatda deyilir.
Məlumata görə, səfirliyin bütün əməkdaşları və onların ailə üzvləri hələlik İsraildə qalacaqlar və hər zaman sığınacaqların yaxınlığında olacaqlar.
Səfirlik izah edib ki, qərar hazırkı təhlükəsizlik vəziyyəti və İsraillə İran arasında davam edən münaqişəni nəzərə alaraq qəbul edilib. Bundan başqa, İsrail ordusunun arxa cəbhə komandanlığının göstərişləri də nəzərə alınıb.
Diplomatik nümayəndəlik vurğulayıb ki, ABŞ vətəndaşlarına İsraili tərk etməyə kömək etmək mümkün deyil, çünki ölkə üzərindəki hava məkanı mülki aviasiya uçuşları üçün bağlıdır. Bundan əlavə, İsrailin bütün dəniz limanları işləmir. Ancaq İsraili qurudan, Misir və İordaniya vasitəsilə tərk etmək mümkündür.
Qeyd edək ki, iyunun 13-nə keçən gecə İsrail İrandakı nüvə və hərbi obyektlərə hücum edərək, “Aslan milləti” əməliyyatına başlayıb. Zərbələr nüvə silahının inkişafı ilə bağlı infrastrukturu, eləcə də iranlı generalların yerləşdiyi yerləri hədəf alıb. Eyni zamanda, İsrailin hava məkanı növbəti xəbərdarlığa qədər tamamilə bağlanıb. Elə həmin axşam İslam İnqilabı Keşikçiləri Korpusu (SEPAH) “Əsl vəd 3” adlı cavab əməliyyatının başladığını elan edib və İsrailə cavab zərbələri endirib. Sonrakı günlərdə İsrail və İran bir-birinə zərbələr endirməkdə davam ediblər. Hər iki tərəf hücumlar zamanı itkilər barədə məlumat verib.
Tətbiqimizi yükləyə bilərsiniz
