Sığorta yığımlarının 90%-i “Paşa”, “Atəşgah” və “Qala” şirkətlərinin payına düşüb

Bu ilin ilk 4 ayı ərzində ölkədə fəaliyyət göstərən 16 sığorta şirkəti tərəfindən ümumilikdə 588 milyon 466 min manat sığorta haqqı yığılıb.
Yeniavaz.com açıqlanan rəsmi məlumatlara istinadən xəbər verir ki, ötən ilin eyni dövrü ilə müqayisədə yığılan sığorta haqları 8,6% və ya 46 milyon 625 min manat artıb.
Qeyd edək ki, sığorta şirkətləri tərəfindən yığılan sığorta haqqının yarıdan çoxunu – 71%-i “Paşa Həyat Sığorta” və “Paşa Sığorta” şirkətləri toplayıb. “Paşa Həyat Sığorta” və “Paşa Sığorta” şirkətlərinin topladığı sığorta haqqı 417 milyon 368 min manat olub.
Ən çox sığorta haqqı toplayanların ilk üçlüyünü 58,5 milyon manatlıq yığımla “Atəşgah Həyat Sığorta” və “Atəşgah Sığorta”, 50,6 milyon manatlıq yığımla “Qala Sığorta” və “Qala Həyat Sığorta” şirkətləri tamamlayır.
Rəqəmlərdən də göründüyü kimi sığorta yığımlarının 89,5%-i adları qeyd olunan 3 şirkətin – “Paşa”, “Atəşgah” və “Qala” sığorta şirkətlərinin payına düşüb.
Bu ilin ilk 4 ayında 3 şirkətin topladığı sığorta yığımlarının ümumi məbləği 526,5 milyon manat olub.
Ən az sığorta haqqı toplayan şirkət isə 1,1 milyon manatlıq yığımla “İpək Yolu Sığorta” şirkəti olub.

Elnur Əli