İlk xarici səfərini Səudiyyə Ərəbistanına etdi

ABŞ Prezidenti Donald Tramp yanvar ayında vəzifəyə başladıqdan sonra ilk dövlət səfərini Səudiyyə Ərəbistanına edib.
Yeniavaz.com xəbər verir ki, bu barədə Səudiyyə Ərəbistanının “Al Arabiya” telekanalı məlumat yayıb.
Məlumata görə, Trampın təyyarəsi Ər-Riyaddakı Kral Xalid beynəlxalq hava limanına enib. ABŞ Prezidentinin çərşənbə axşamı Səudiyyə Ərəbistanı rəhbərliyi ilə görüşəcəyi, həmçinin Səudiyyə-ABŞ investisiya forumunda iştirak edəcəyi gözlənilir.
Tramp mayın 13-dən 16-dək Səudiyyə Ərəbistanı, Qətər və Birləşmiş Ərəb Əmirliklərində səfərdə olacaq. Aprelin sonunda Papa Fransiskin dəfn mərasimi üçün Romaya qısa səfərdən başqa, bu, ABŞ Prezidentinin yanvarın 20-də vəzifəyə başladıqdan sonra ilk tamhüquqlu xarici səfəridir.
Amerika nümayəndə heyətinə, dövlət katibi Marko Rubio, Pentaqonun rəhbəri Pit Heqset və maliyyə naziri Skott Bessent daxildir.
Səfər zamanı Amerika nümayəndə heyəti ərəb monarxiyaları ilə investisiya əməkdaşlığının genişləndirilməsinə diqqət yetirəcək, həmçinin müdafiə və təhlükəsizlik, o cümlədən Qəzza zolağı, Yəmən və Ukraynadakı münaqişələrin həlli ilə bağlı məsələlərə toxunacaq.