“ABŞ Ukrayna ilə sazişdən ən azı 350 milyard dollar gözləyir” – Tramp

ABŞ Ukrayna ilə yeraltı sərvətlərə dair razılaşmaya əsasən 350 milyard dollardan çox gəlir əldə edə bilər.
Yeniavaz.com xəbər verir ki, bu barədə ABŞ Prezidenti Donald Tramp “NewsNation” telekanalında bildirib.  
“Bu gün biz elə bir sövdələşmə əldə etdik ki, nəzəri olaraq 350 milyard dollardan çox gəlir əldə edə bilərik”, - Amerika lideri sazişi şərh edərkən deyib.
O, həmçinin nadir torpaq metallarının Ukrayna üçün böyük sərvət olduğunu qeyd edib.
Siyasətçi izah edib ki, Ukrayna onun sələfi Co Baydenin prezidentliyi dövründə ABŞ-dən maliyyə tranşları və silah tədarükü ilə 350 milyard dollar alıb.
Bununla belə, məsələn, 2025-ci ilin yanvarında, Donald Trampın andiçmə mərasimindən təxminən iki həftə əvvəl ABŞ Müdafiə Nazirliyi Ukraynaya növbəti hərbi yardımdan sonra bildirib ki, Co Bayden administrasiyası dövründən bəri Birləşmiş Ştatlar Ukraynaya 66,5 milyard dollardan çox təhlükəsizlik yardımı, o cümlədən Rusiyanın genişmiqyaslı əməliyyatından sonra təxminən 65,9 milyard dollar ayırıb.
Prezident Bayden administrasiyası Ukraynaya iqtisadi və humanitar yardım da göstərib. CNN-in məlumatına görə, müharibə başlayandan bəri ABŞ Ukraynaya ümumilikdə təxminən 123 milyard dollar yardım edib.
Qeyd edək ki, aprelin 30-da ABŞ və Ukrayna arasında nadir torpaq metalları haqqında saziş imzalanıb. Bununla əlaqədar Baş nazir Denis Şmıqal izah edib ki, ölkə öz yerin təki, təbii sərvətləri və infrastrukturu üzərində tam nəzarəti özündə saxlayacaq. Bundan əlavə, Kiyev və Vaşinqton bərabər əsasda investisiyaların bərpası fondu yaradacaqlar: hər iki tərəfin orada bərabər səsvermə hüququ olacaq. Hər iki ölkə fonda töhfələr verəcək və onun fəaliyyətindən əldə olunan gəlirlər yalnız Ukraynaya yatırılacaq.