Amerika Prezidenti Donald Trampın bu ilin yanvarında hakimiyyətə gəlişindən bəri ABŞ-də ən azı 121 min federal hökumət işçisi işdən çıxarılıb.
Yeniavaz.com xəbər verir ki, bu barədə bazar ertəsi CNN telekanalı öz hesablamalarına istinadla məlumat yayıb.
Məlumata görə, kütləvi ixtisarlar 30-a yaxın departamentə təsir edib. Lakin ən çox ABŞ Beynəlxalq İnkişaf Agentliyi (USAID) zərər çəkib. Bir neçə ixtisar dalğasından sonra onun fəaliyyəti dayandırılıb. Təhsil Nazirliyi işçilərinin 51%-ni ixtisar edib və 12 regional idarədən 7-ni bağlayıb.
ABŞ-nin Mənzil Tikintisi və Şəhərsalma Departamenti və Səhiyyə və Sosial Xidmətləri Departamentinin bir hissəsi olan Milli Sağlamlıq İnstitutu əhəmiyyətli sayda işçisini itirib.
Ekspertlərin fikrincə, bu ixtisarların nəticələri artıq amerikalılar tərəfindən hiss olunur və hökumətin təhsil, səhiyyə və ictimai təhlükəsizlik sahələrində öz vətəndaşlarının maraqlarını təmin etmək qabiliyyətini sual altına qoyur.
İnauqurasiyadan qısa müddət sonra Tramp “şişmiş hökuməti” ixtisar etmək və bürokratiya ilə mübarizə aparmaq üçün bir sıra tədbirlər görəcəyini açıqlayıb. O, həmçinin amerikalı sahibkar İlon Maska Hökumətin Səmərəliliyi Departamentinin (DOGE) işinə nəzarət etməyi tapşırıb.
ABC, “The Washington Post” və “Ipsos”un aprelin 28-də keçirdiyi sorğuya əsasən, amerikalıların təxminən 57 faizi Maskın Tramp administrasiyasındakı fəaliyyətini bəyənmir.
Sorğuda iştirak edənlərin yarıdan çoxu hesab edir ki, DOGE tərəfindən həyata keçirilən dövlət qulluqçularının kütləvi ixtisarı həddindən artıq irəli gedib.
Tətbiqimizi yükləyə bilərsiniz
