Rusiya ölkə sərhədləri yaxınlığında təlim atışları keçirmək planlarına görə Yaponiya səfirliyinə kəskin etiraz edib.
Yeniavaz.com xəbər verir ki, bu barədə Rusiya Xarici İşlər Nazirliyinin saytında məlumat yayılıb.
“Aprelin 17-də Yaponiyanın Moskvadakı səfirliyinə cari ilin iyun ayında Hokkaydo adasında Rusiya Federasiyasının sərhədlərinə yaxın ərazidə 200 km-ə qədər mənzilli Tip-88 raketləri ilə təchiz edilmiş SSM-1 gəmi əleyhinə raket komplekslərindən təlim atışlarının keçirilməsi planları ilə bağlı sərt etiraz edilib”, - məlumatda bildirilib.
Nazirlik Rusiyanın Uzaq Şərq sərhədləri yaxınlığında bu cür təxribat xarakterli hərbi fəaliyyəti milli təhlükəsizliyə potensial təhdid kimi qiymətləndirib və bunu qəti şəkildə qəbuledilməz hesab edib:
“Tokionun bu cür hərəkətləri Şimal-Şərqi Asiyada və bütövlükdə Asiya-Sakit okean regionunda gərginlik səviyyəsinin artmasına gətirib çıxarır”.
Tətbiqimizi yükləyə bilərsiniz
