Ursula fon der Lyayen korrupsiyada ittiham olunur

Belçikanın Lyej məhkəməsi Avropa Komissiyasının (AK) rəhbəri Ursula fon der Lyayenin 35 milyard avrodan çox COVID-19 vaksinlərinin satın alınmasında korrupsiya ittihamlarına qarşı qanuni toxunulmazlığının olub-olmaması ilə bağlı məhkəmə iclası keçirəcək.
Yenavaz.com xəbər verir ki, bu barədə TASS-a iddiaçı, belçikalı fəal Frederik Baldan məlumat verib.
Onun sözlərinə görə, iclas yanvarın 6-da Avropa İttifaqı (Aİ) Prokurorluğunun müraciəti əsasında baş tutacaq. Belə ki, Baldan Aİ Prokurorluğunun fon der Lyayenin klinik sınaqlardan keçməmiş COVID-19 peyvəndlərinin satın alınmasında korrupsiya ittihamı ilə təqibdən toxunulmazlığa ​​malik olduğunu iddia edərək, məhkəməyə müraciət etdiyini bildirib.
O qeyd edib ki, AK rəhbəri belə toxunulmazlığa malik ola bilməz, çünki o, səlahiyyətlərinin hüdudlarından çox kənara çıxıb.
Öz növbəsində, Baldanın vəkili Dian Prota bildirib ki, məhkəmə Aİ Prokurorluğunun fon der Lyayenin bu işdə toxunulmazlığa malik olduğu mövqeyini bölüşsə belə, iddiaçılar məhkəmə yolu ilə ondan məhrum edilməsini axtaracaqlar.
“Belə presedentlər bu günə qədər də olub. Məsələn, 1999-cu ildə Jak Santerin Avropa Komissiyası korrupsiya qalmaqalı ilə əlaqədar tam tərkibdə istefa verib” -  Prota bildirib.
Vəkil həmçinin vurğulayıb ki, bu iddia geniş ictimai rezonansa səbəb olub. Belə ki, fon der Lyayenə qarşı ittihamlar artıq minə yaxın Aİ vətəndaşı, əsasən də COVID-19 pandemiyası dövründə yaxınlarını itirən və ya yoxlanılmamış peyvənddən əziyyət çəkən insanlar tərəfindən dəstəklənir.
Qeyd edək ki, Ursula fon der Lyayen Aİ ölkələri ilə əvvəlcədən razılaşmadan 2020-ci ilin sonunda Amerikanın “Pfizer” şirkətinin baş direktoru Albert Burla SMS yazışmaları vasitəsilə sınaqları hələ tamamlanmamış peyvəndin alınması üçün müqavilə bağlamaqda ittiham olunur. 
Bu iddia üzrə ilk dinləmə 17 may 2024-cü ildə baş tutub. Dekabrın 6-da baş tutmalı olan ikinci dinləmə isə fon der Lyayenin toxunulmazlığı üçün məhkəməyə əks-tələb göndərən Aİ Prokurorluğunun demarşı ilə əlaqədar faktiki olaraq pozulub.
Məhkəmə bu gün məhz bu vəsatətə baxmalıdır.