İsrail Qəzza sərhədində yeni keçid məntəqəsi açdı

İsrail hakimiyyəti Qəzza zolağı ilə sərhəddə yeni keçid məntəqəsi açıb.
Yeniavaz.com xəbər verir ki, bu barədə İsrail ordusunun mətbuat xidməti məlumat yayıb.
Bildirilib ki, yeni keçid məntəqəsi Fələstin anklavının mərkəzi hissəsinə yaxın Kisufim kəndi yaxınlığında yerləşir və Qəzzaya humanitar yardımın çatdırılması üçün nəzərdə tutulub.
 “Siyasi rəhbərliyin göstərişlərinə uyğun olaraq və Qəzza zolağına yardımın çatdırılması üçün marşrutların həcmini və sayını artırmaq səyləri çərçivəsində bu gün, çərşənbə axşamı Kisufim sərhəd keçid məntəqəsi açılıb”, - məlumatda deyilir.
Ordunun mətbuat xidməti qeyd edib ki, anklavın mərkəzi və cənub rayonlarının sakinləri üçün sığınacaqların yaradılması məqsədilə bu keçid məntəqəsi vasitəsilə ərzaq, su, dərman və avadanlıqlar gətiriləcək.