“Putin Baydenlə təmaslara açıqdır” – Peskov

“Rusiya Prezidenti Vladimir Putin amerikalı həmkarı Co Bayden də daxil olmaqla istənilən təmaslara açıqdır”.
Yeniavaz.com TASS-a istinadla xəbər verir ki, bu barədə Rusiya liderinin mətbuat katibi Dmitri Peskov brifinqdə məsələ ilə bağlı sualı cavablandırarkən deyib.
Onun sözlərinə görə, ancaq indiyədək Moskva ilə Vaşinqton arasında məsələ ilə bağlı heç bir danışıq söhbəti olmayıb.
Digər tərəfdən, bundan əvvəl ABŞ Prezidenti Co Bayden TASS-ın sualına cavab olaraq, noyabrda Braziliyada keçiriləcək İyirmilik Qrupunun (G20) və ya Asiya-Sakit Okean İqtisadi Əməkdaşlıq Təşkilatının (APEC) qarşıdan gələn sammitlərində liderlərin görüşü çərçivəsində Putinlə mümkün söhbəti istisna etməyib.
Bayden həmçinin Putinlə beynəlxalq platformalarda Ukrayna və beynəlxalq təhlükəsizlik məsələlərini müzakirə etməyin mümkünlüyündən danışarkən Rusiya liderinin orada olacağına şübhə etdiyini, ancaq perspektivli təmasların istisna olmadığını bildirib.
“Bu məsələ ilə bağlı heç bir danışıqlar aparılmayıb. Baxmayaraq ki, Rusiya Prezidenti bütün əlaqələrə açıqdır”, - deyə Kreml nümayəndəsi əlavə edib.
Qeyd edək ki, G20 sammitinin noyabrın 18-19-da Braziliyada keçiriləcəyi gözlənilir. Peruda keçiriləcək APEC sammitinin rəsmi tarixi isə 9-16 noyabrdır.