Məşhur türkiyəli jurnalist vəfat etdi

Türkiyə mətbuatının ustad simalarından olan Güneri Cıvaoğlu bu gün səhər saatlarında müalicə aldığı xəstəxanada dünyasını dəyişib.
Yeniavaz.com Türkiyə KİV-ə istinadla xəbər verir ki, 85 yaşlı Cıvaoğlu bir neçə həftə əvvəl İstanbulun məşhur restoranlarından birində müvazinətini itirərək yıxıldığı və başından zədə aldığı üçün xəstəxanaya aparılmış və reanimasiyaya yerləşdirilimişdi.
30 iyul 1939-cu ildə Ankarada anadan olan Güneri Cıvaoğlu jurnalist, hüquqşünas, xəbər və televiziya aparıcısı kimi fəaliyyət göstərib. Ankara Universitetinin Hüquq fakültəsinin tələbəsi olan Cıvaoğlu jurnalistikaya “Akış” jurnalı və “Yeni İstanbul” qəzetində müxbir kimi addım atıb. O, Türkiyə Radio Televiziya İdarəsinin yaranması prosesində səhər xəbərlərini hazırlayan komandada yer alıb. Daha sonra “Tercüman” qəzetinin baş redaktoru olub. O, “Güneş” qəzetinin ortaqlarından olub və uzun müddət onun baş redaktoru vəzifəsində çalışıb. 1986-1996-cı illərdə “Sabah” qəzetində köşə yazarı, “Show TV”də menecer vəzifələrini tutub. 1996-cı ildən “Milliyet” qəzetinin baş redaktoru olub. “Kanal D”nin əsas xəbər bülleteninin aparıcısı olub. Eyni kanalda “Durum” adlı televiziya proqramını təqdim edən Cıvaoğlu, digər kanalda “Şəffaf otaq” proqramının da aparıcılığını edib.