ABŞ və Çin arasında yüksək səviyyəli hərbi danışıqlar keçiriləcək

ABŞ və Çin arasında Hind-Sakit okean regionunda gərginliyi azaltmaq üçün tezliklə yüksək səviyyəli hərbi təmaslar baş tutacaq.
Yeniavaz.com xəbər verir ki, bu barədə mənbələrə istinadla “Fox News” telekanalı məlumat yayıb.
Məlumata görə, söhbət hər iki ölkənin Asiyadakı komandirlərinin iştirak edəcəyi telefon danışıqlarından gedir.
Qeyd edək ki, son vaxtlar Cənubi Çin dənizində insidentlərin tez-tez baş verməsi gərginliyin artmasına səbəb olub. Belə ki, Çin sahil mühafizə gəmiləri Filippin gəmilərini sıxışdırmağa çalışıb və onlar arasında toqquşma halları qeydə alınıb. Avqustun 28-də Filippin Cənubi Çin dənizindəki insidentlər fonunda ABŞ-Filippin Qarşılıqlı Müdafiə Müqaviləsinin əhatə dairəsini genişləndirməyi təklif edib.
Xatırladaq ki, Çin uzun müddətdir ki, şelfdə nəhəng karbohidrogen ehtiyatlarının aşkar olunduğu Cənubi Çin dənizindəki ayrı-ayrı adaların ərazi mülkiyyəti ilə bağlı bəzi ölkələrlə mübahisələr aparır.