Pezeşkianın birinci gedəcəyi ölkə açıqlandı

İranın yeni Prezidenti Məsud Pezeşkian seçildikdən sonra ilk xarici səfərində İraqa gedəcək.
Yeniavaz.com xəbər verir ki, bu barədə İranın Bağdaddakı səfiri Məhəmməd Kazım Əl-Sadiq İRNA-ya müsahibəsində bildirib.
Onun sözlərinə görə, Pezeşkian İraqın Baş naziri Məhəmməd əl-Sudaninin rəsmi dəvəti ilə sentyabrın ortalarında Bağdada səfər edəcək.
Kazım Əl-Sadiq vurğulayıb ki, bu səfər zamanı İranın əvvəlki prezidenti İbrahim Rəisinin dövründə əldə olunmuş razılaşmalar üzrə bəzi sazişlərin imzalanması gözlənilir. Səfir həmçinin Pezeşkianın səfərinin iki ölkə arasında münasibətlərin inkişafına və dərinləşməsinə töhfə verəcəyinə ümid etdiyini bildirib.
Qeyd edək ki, iyulun 5-də İranda Rəisinin ölümündən sonra təyin edilmiş növbədənkənar prezident seçkilərinin ikinci turu keçirilib. Seçkilərdə islahatçılar qanadının namizədi, keçmiş səhiyyə naziri Pezeşkian qalib gəlib. Avqustun 21-də isə İran parlamenti respublikanın yeni dövlət başçısının təklif etdiyi siyahı üzrə bütün nazirləri təsdiqləyib.