Latviya qadınlar üçün həqiqi hərbi xidmət tətbiq edə bilər

Latviya 2028-ci ildə qadınları həqiqi hərbi xidmətə çağırmağa başlaya bilər.
Yeniavaz.com “Delfi” portalına istinadla xəbər verir ki, bu açıqlama ilə Baltik Respublikasının müdafiə naziri Andris Spruds çıxış edib.
“Əlbəttə, bu, bu gün və ya sabah baş verməyəcək”, - deyə müdafiə naziri qadınlar üçün hərbi xidmətin tətbiqi planlarını şərh edərkən bildirib.
Spruds əlavə edib ki, 2028-ci il optimal vaxt çərçivəsi ola bilər. Bu vaxta qədər səlahiyyətlilər çağırışçıların sayını ildə 4 minə çatdırmaq istəyir.
Müdafiə naziri həmçinin əlavə edib ki, bu vaxta qədər hökumət bir sıra hazırlıq işləri görməlidir. O qeyd edib ki, əvvəlcə bu məsələ ilə bağlı siyasi müzakirə aparılmalıdır. Digər tərəfdən, hərbi xidmətə gedən qadınlar üçün lazımi geyim, avadanlıq ehtiyatı yaradılmalıdır. Sprudsun sözlərinə görə, artıq Latviyanın Milli Silahlı Qüvvələrinə müvafiq əmrlər verilib.
Qeyd edək ki, 2024-cü ilin yanvarında Latviyada 2007-ci ildə ləğv edilmiş 18-27 yaş arası kişilər üçün həqiqi hərbi xidmət bərpa edilib.