“Apple” “iPhone 16”nın təqdimat tarixini açıqladı

“Apple” yeni “iPhone 16” smartfonlarının təqdimat tarixini açıqlayıb.
Yeniavaz.com xəbər verir ki, bu barədə “The Verge” nəşri məlumat yayıb.
Məlumata görə, tədbir sentyabrın 9-da Kupertinonun “Apple” Parkında yerləşən Stiv Cobs Teatrında baş tutacaq.
“Apple”ın “iPhone 16”, “iPhone 16 Plus”, “iPhone 16 Pro” və “iPhone 16 Pro Max” olmaqla 4 “iPhone 16” modelini təqdim edəcəyi gözlənilir.
“iPhone 16” və “iPhone 16 Plus” arxa tərəfində şaquli yerləşdirilmiş kameraya sahib olacaq, “iPhone Pro” modelləri isə ənənəvi üçlü kamera quruluşunu saxlayaraq daha böyük ekranlara və yeni bürünc rəngə sahib olacaq.
Həmçinin, yeni cihazlarda fotoaparat çəkilişini imitasiya edən “Capture” düyməsi də ola bilər.
Tədbirdə əsas mövzuların süni intellekt və “Apple Intelligence” xüsusiyyətlərinin olacağı gözlənilir.